世界上每樣野都有規有矩, 喺商業社會當然都唔例外, 特別係點樣埋數、入賬更加係一大堆框架守則.
大家跟住同一款規則先可以有可以做到比較. 如果一間公司只要賣出貨物, 唔理收左錢未, 都可以當收入; 而另一個國家要收到Cash 先當賣出收入. 兩間公司嘅賣出定義唔一樣的話, 作為外人又點可以睇住盤數嚟做比較.
現時各國都傾好左一份世界通用嘅「規矩」, International Financial Reporting Standards (IFRS), 不過美國佬有自己另一套玩法(GAAP), 我地今日就唔理佢住.
喺IFRS 之下, 每個地區/國家會因為當地嘅法律/稅務/文化/& 其他因素 再會定立自己嘅「規矩」, 但大體上都係跟住IFRS 咁去定義/修改/實行.
因為現實社會嘅轉變, IFRS做左好多嘅修改&更新, 當然依啲改動係咪更能夠反映每間公司盤數嘅真實性係值得討論, 不過咁悶嘅野緊係唔會喺到講...
例子: 邪惡美帝喺2008年發生金融海潚, 各國覺得舊嘅方法(IAS 39) 唔太能夠反映公司嘅金融資產價值&風險, 所以夾手夾腳搞左個IFRS 9出嚟, 2009年發表, 2018年強制實行.
**************************************************************************
咁過去& 未來依幾年, 又有幾多「規矩」改過? 未來又有幾多將會被改呢?
我搵唔到一張靚仔啲嘅圖, 唯有喺年報搵例子
 |
| 0659新創建, 2019年報 |
新創建喺2019年嘅年報入面提到, 佢地喺盤數入面用左同以前唔同嘅「規矩」, 包括, 9號;2號;4號;15號;40號;22號
未完, 仲有一堆嚟緊會改,
喺2019年7月打後先會實施嘅包括: 16號;17號;3號;9號;10號;19號;28號.....
換句話說, 2019年之前嘅入數方法同2019年 係會唔一樣
而2019年 同打後年份嘅入數方法, 亦會唔一樣
如果我用新創建過去5年嘅平均市盈率 去睇現時嘅股價貴唔貴, 結果就係參考性不大
因為計算盈利嘅「規矩」已經唔同, 每年/隔幾年都有野唔同左...
其實唔止新創建, 係所有公司都會一齊用新「規矩」...
**************************************************************************
今日就緊係唔會每條「規矩」慢慢睇, 但我會拎幾個會影響到盈收嘅例子出嚟講下, 等大家有個概念
 |
| 2388中銀香港; 2018年報 |
其中一條係關於"金融工具".
"金融工具"除左一般理解到嘅股票/債券, 仲會包括借出街嘅錢, 賒數賣貨(買方遲啲先找數).
今次「規矩」係由 HKAS 39號 更新為 HKRS 9號,
點樣為"金融工具"做減值 & 撥備
HKFRS 9的減值模型範圍內的資產，其減值結果將因而較香港會計準則第39號下的減值結果更具有前瞻性。該些資產的減值損失預計會增加及較為波動。
人話簡單講, 以前見到對方走數先會做個撥備, 依家係未有事發生就估定對方會唔走數.
撥備嘅機率& 金額都大左
樓上2388中銀香港就話喺2018開始使用新「規矩」之後, 撥備金額由 $4,156 新增為 $5,596 ,增加左 $1,440百萬= 14億 ; 咁同時盈利亦會減少左14億.
再諗深一層去講, 2018年之前 & 之後嘅撥備方法唔同, 金額唔同, 盈利計法都唔同
如果我地用中銀香港今日嘅P/E 市盈率 同佢自己五年平均數去比較貴唔貴. 唔好意思! 參考值細左好多, 因為計算盈利把尺唔一樣.
*****************************************************************************
 |
| 0293國泰航空; 2018年報 |
國泰喺2018年都用左新「規矩」, 名稱係HKFRS15「來自客戶合約的收益」.
大約係講確認收入嘅時間點 & 定義同以前唔同.
對國泰有咩影響呢咁? 上圖顯示喺用左新「規矩」後, 收益數字增加左 $1,910 (19億)
開支增加左$1,901 (19億)
咁收益同開支都變晒, 盈利仲會唔會一樣?
喺2018年嘅前後, 個市盈率參考價值又細左
***************************************************************************
 |
| 0240利基; 2018年報 |
另一個例子, 係0240利基控股, 主要業務係做地基& 建築工程
同上一個例子一樣, 都係關於HKFRS15「來自客戶合約的收益」
點樣定義收入對佢地個影響都唔細, 例如: 完工就當收入? 起一層樓計一層收入? 定係要等埋個客滿意先計收入? 今日就唔會詳細解釋, 依啲野咁Q悶😅
我地直接睇下喺新「規矩」之下, 對佢地嘅收入 & 盈利有咩影響.
當年嘅盈利會由 $271,606 增加$142,152 去到 $413,758
咁樣計一計, 換下個收入定義, 盈利就增加左52% , 都咪話唔癡線
假設本身P/E 有10倍, 換個「規矩」, 咁P/E 就變到得返6倍
見唔見到個分別? 公司係咪盈利能力好左? 唔係
係咪做嘅野多左? 唔係
只要改下「規矩」, 盈利就大增, P/E 就下降
咁仲會唔會拎住今日嘅市盈率同往年嘅做比較? 可以嘅, 但唔會得出有用嘅結論.
***************************************************************************
 |
| 0341大家樂; 2019/20年報 |
大家樂做咩業務應該唔洗多解釋? 佢係做餐飲業為主, 會租好多鋪位, 而新嘅「規矩」 HKFRS 16「租賃」就係關於鋪租嘅新入數方法.
IFRS 16 (使用權資產) 嘅影響
至於會點樣影響到公司嘅資產負債; 盈利; 現金流, 大家可以睇返我之前嘅Blog
今日直接講答案.
新「規矩」之下, 大家樂喺2020年嘅盈利會由 $95,316 下降為 $74,386
然後我又再一次loop 返同樣對白
公司賺錢能力差左? 唔係
收入差左? 唔係
只係入數方法唔同左, 盈利就唔同左
公司特登嘅? 唔係. 而係按大家公認嘅會計「規矩」去重新入數
*******************************************************
回想返上幾篇P/E 市盈利率嘅例子
第1 & 2: 分別係中國鐵塔同美股, 公司自己更改資產使用嘅年期, 最後盈利上升
第3: 係銀河娛樂, 自己借住一次環球性事件, 大幅度減值資產, 影響晒往後嘅盈利
第4: 突發性, 意外, 一次性 嘅特殊收益 & 支出, 影響盈利同往年唔同
今日第5, 唔係公司自己手多, 亦唔係外在因素, 而係大家嘅「規矩」入數方法唔同左
公司無變, 資產無變, 工作量無變, 只係入數方法改左, 盈利就唔同晒
留意, 每隔幾年就會有「規矩」新加入, 唔係一次性只係某一年改完就算.
-完-
下一篇就真係最後, (我都講到攰)😅
我會講下如果真係要用P/E 市盈率時, 可以點做?
真係一世都唔用得?
有咩位要注意?
*********************************************************************************************
🔴🔴🔴Patreon支持: 港股美股英股估值
🟡🟡🟡YouTube Channel
🟠🟠🟠Blog: 業績分析, 會計技巧
🟦🟦🟦Facebook Page
🟩🟩🟩若果寫嘅野幫到你, 請我飲咖啡? PayMe!
*********************************************************************************************
2588中銀飛機租賃睇PE?
買股睇PE? (1) 中國鐵塔
買股睇PE? (2) 美股都係咁?
買股睇PE? (3) 我最鐘意嘅一個Case
買股睇PE? (4) 一次性? 有意外!!!
IFRS 16 (使用權資產) 嘅影響
關於LSE 嘅提問; PE Ratio 有咩要注意?
數簿書單推介
6823 派息長期over100% ? [派息比率]
現金流量表 點解要減？點解要加？
E-mail: DKLM10PM@gmail.com
吊打成哥既pe 估值
回覆刪除