今日順手寫比佢睇，再post比大家過目
依隻英國收息股喺一位網友介紹嘅，自己都有少少研究
我會盡量用“人話” 去講🤣 因為佢真係有啲複雜，主要講佢嘅商業模式，點賺錢，未來有咩前景。數字野太深留返之後(你地有興趣再睇的話)
************************************************************************************
喺講佢之前，要重溫下 MPF。係！香港嘅MPF 強積金
香港嘅MPF，就係打工仔喺工作期間儲錢，但唔係放落自己銀行户口，而係放入基金管理人，而我地可以選擇依班基金管理人去投資啲咩資產
現時喺香港可供選擇嘅資產唔算多，主要係：銀行定期；債劵；股票。
而依班基金管理人會每年收取管理費。投資升左佢地有無得分？無嘅。輸左要唔要賠錢？都係唔需要嘅。咁由頭到尾佢需唔需要自己出錢？佢地係唔洗嘅。但就可以每年賺取某個百分比嘅管理費。
返嚟我地作為一般打工仔依到。
由20歲開始到60歲，每日返工，每月出糧，每月儲錢落MPF。咁幾時可以拎錢？退休60歲嗰日。拎幾多？一次過拎晒。
我地望下外國。外國就無MPF依一樣嘅東東，但有樣野叫Pension。
Pension點玩？(以我理解) 都係由員工&老細一齊供款落公司嘅Pension 户口，由老細再搵出面嘅專業人士(基金經理) 去幫手管理。一般嚟講依啲Pension，老細會承諾一個保證回報(又要保本) ，直到幾時？直到永遠。
因爲Pension 個玩法係： 20-60歲供款，60歲開始就每月拎生活費比返個員工，直至佢過身。
唔少公司開始發現中左伏🤣 點解：
1. 之前應承嘅保證回報講得太高
2. 依家息口太低，好難搵到咁高回報嘅投資物
3. 佢地過去多數玩Bond, 但bond嘅回報都好低
4. 啲人愈嚟愈長命，pension嘅錢唔夠派 (好似內地嘅社保咁)
5. 啲老細要自己管埋 Pension 投資，搞唔掂
基於以上嘅難點，有個行業就慢慢成長緊。
上圖係LGEN 嘅商業模式，佢主要有四個支柱
四條柱互相支持，有一個好大嘅協同效應，我會逐一用“人話”講下
藍色：退休金/Pension。樓上講過啲老細對住堆 Pension 都好頭痛，所以啲老細就成舊 Pension組合賣比LGEN。
LGEN 就答應喺未來比返應承左嘅回報，比返嗰啲老細。老細煩少樣野，咁對LGEN 有咩好處？
綠色：投資管理 (啫係香港嘅MPF基金管理人)
LGEN 幫班老細管理Pension緊係唔會免費。首先收一層管理費先。而LGEN 亦都係自己做埋落手落腳去揀投資物。當然，LGEN 除左管理Pension, 亦有幫其他公司管理投資需要。例如？ 一啲大學嘅獎學金。一啲出面嘅保險公司。甚到政府&半官方機構。
 |
| LGEN 同 其他機構投資者 & 大學獎學金 一齊夾錢投資 |
黃色：LGEN自己會出錢一齊投資
LGEN 會夾埋喺上面拎到嘅錢：Pension, 獎學金, 保險公司 。再加埋LGEN自己袋嘅錢一齊去做投資。
再人話啲，LGEN 收人錢(管理費) 再去做自己想做嘅投資。高過對方要求嘅回報，LGEN就可以袋落自己袋。(如：pension要求6%回報，LGEN做嘅投資拎到10%回報，咁LGEN就可以袋走4%)
最後一部份，灰色：保險
依部份同 Pension退休金[藍色] 都有關連，因爲啲友仔愈嚟愈長命 (逆按揭)
另一邊，保險得到嘅保費需要投資去賺取息差，咁依部份就可以交比[綠色&黃色]
對於LGEN嚟講，佢就好似借左一筆超長期嘅貸款(Pension). LGEN可以充份利用人地嘅錢，去賺取投資回報落自己袋。而因為堆pension已經比LGEN買起左，相對上唔驚依舊錢會隨時比人提走(比人call loan)，換句話講，LGEN可以一路收取管理費，做一啲超長期嘅投資，食盡潛在嘅複息效應。 一個 Positive loop.
以上係LGEN 四個支柱之間嘅關聯性& 如何互惠互利。
************************************************************************************
咁嚟緊嘅宏觀環境點樣幫到 LGEN?
順序落：
1. 人口老化，會有更多嘅公司頂唔住想賣走個pension。而啲人長命左，佢地嘅pension要被管理嘅時間會更長。(收更耐嘅管理費)
2. LGEN 會積極投資環球資產，尋求更多機會(&分散風險)
3. 樓上講過，有長期嘅資金鏈做根基(pension)，LGEN可以投資一啲時期更長嘅資產。如：起商業樓宇，起住宅，初創公司，清潔能源，中小企貸款。(ESG)
對比投資股票，以上講到嘅資產可能要更長嘅時間去成長，但可以享受到更長期嘅複息增長。而且價格亦波動較細(風險較細)。
另外，隨住依堆資產增值，LGEN代管嘅資產值亦會提高，管理費收入又會一齊升。😎
4. 社會上對退休後嘅資產管理需求。更多人意識到理財嘅重要性：保險；退休金；儲蓄。
5. 科技 (吹水) 🤣🤣
6. Refer to point 3 。LGEN 會做ESG 嘅先行者。
起英式居屋(ESG 入面嘅社會責任：S)
提供資金支持 初創&中小企( ESG : S)
投資綠色能源 (ESG: E)
************************************************************************************
上述講左LGEN 喺今日嘅 商業模式& 未來嘅發展
之後會補返LGEN嘅估值。
-完-
初稿: 12月08日; 0140pm..
LGEN 公司網頁: https://group.legalandgeneral.com/en/investors/results-reports-and-presentations/
都係下年去英揮手
回覆刪除